Friday, January 26, 2018

කවි බණ


                     අද උදේ, වැඩට එන්න බස් එකට නැගලා ටික දුරක් යද්දී ඩ්‍රයිවර් මහත්තයා බස් එක එලවන ගමන්ම කලබලේ සීඩී ගොඩක් අවුස්සලා අවුස්සලා එකක් තෝරගෙන ප්ලේයර් එකකට දැම්මා. එකත් එකටම මියුසිකල් ශෝ එකක හරි අඬන වැලපෙන සිංදු ටිකක් කියලා හිතුනා. නෑ කවි බණක්.
         දුප්පත් එක ඇහැක් අන්ධ් අම්මා කෙනෙක් සැමියා නැතුව පුතෙක් උස් මහත් කරනවා. ටික ටික ලොකු වෙද්දී අම්මා කැතයි කියලා පුතාට ලැජ්ජා හිතෙනවා. ඊට පස්සේ අම්මාව එපා වෙනවා . ඉගනගෙන රට ගිහින් විවාහ වෙනවා. අම්මාව අත හරිනවා. අම්මා පුතා හොයන් ගිහාම හිඟන්නියක් කියලා එලව ගන්නවා. අවසානෙදි ගමේ ඉස්කෝලෙ ආදි ශිෂ්‍ය සංගමේ රැස්වීමකට යන ගමන් ගෙදරට යනවා. ගෙදර කඩන් වැටිලා. අම්මා මිය ගිහින්. අසල් වැසියෙක් ලියුමක් ගෙනත් දෙනවා.අම්මා ගෙ එක ඇසක් අන්ධ වෙලා තියෙන්නෙ, පුතා ඉපදෙනකොට එක ඇහැක් අන්ධ වෙලා ඉපදුන නිසා අම්මා එක ඇහැක් පුතාට දීලා. ඔය කතාව මම කොහෙදි හරි කියෙව්වා වගේ මතකයි.
                            හොඳම වැඩෙ කියන්නේ ටිකක් දුර යද්දී බස් එකේ කට්ටිය මීයට පිම්බා වගේ සද්දයක් නැතුව අහන් ඉන්නවා. ඒ කවි හදවතටම දැනෙනවා. මගෙ ඇස් වලටත් කඳුළු පිරීගෙන එද්දී මම වෙන අතකට හිත යොමුකරන්න උත්සාහ කලාට හරි ගියෙම නෑ. වෙනදා සිංදු ඇහෙද්දී ඇහෙන්නෙ නෑ වගේ ඉන්න පුලුවන් උනාට අද එහෙම බෑ. කොහොම හරි උනපු කඳුළු කම්මුල් දිගේ පෙරලිලා ගියා. ඇත්තටම මට ලැජ්ජ හිතුනා. මම ළඟම හිටගෙන උන්නා ඇන්ටිලා දෙන්නෙක්. අර කවි ඇහිලා කඳුලුත් එනවා කියලා මාව පෙන්නලා ඒ දෙන්නා කතා උනා. මම බහිනකනුත් කවි ඉවර වෙලා තිබුනෙ නෑ. මම අනිත් වාඩි වෙලා උන්න අය දිහාත් බහින්න යද්දී හොරෙන් බැලුවා.ගොඩක් අයගේ ඇස් අග කඳුළු බිංදු එකතු වෙලා තිබුනා. වෙනදාට පුංචි දේටත් මගීන්ට කෑගහන කොන්දොස්තර ගෙන් සද්දයක් නෑ.
                    මිනිස්සුන්ගේ හදවතට දැනෙන්න කතා කරන්න සමහර නිර්මාණ වලට පුළුවන් නේද කියලා මට හිතුනා.

Tuesday, January 23, 2018

Tube House

             දියුණු රටවල් වල මෙන්ම නොදියුනු රටවල් වලද, ප්‍රධාන නගර ආශ්‍රිතව පදිංචියට සුදුසු නිවසක් හොයාගන්න එක තරමක් දුෂ්කර කාර්යයක්. නිවාස තිබුනත් ඒවායේ බදු , කුලී මුදල් ගොඩක් අයට ඔරොත්තු දෙන්නෙ නෑ. මිලට ගන්න ගියත් ඉහළ මිලකට තමයි අලෙවි වෙන්නෙ. මධ්‍යම පාන්තිකයින්ට තමන්ගේම නිවහනක් ප්‍රධාන නගරයකින් මිලට ගැනීම හීනයක්. ලෝකයේ බොහෝ රටවල මෙයට පිළියම් වශයෙන් තට්ටු නිවාස ගොඩ නැගුනා. ඊට අමතරව අපේ රටේ නැතත් වෙන රටවල් වල මේ සඳහා විසඳුම් හොයන්න, අඩු වියදමකින් නිවාස නිර්මාණය කරන්න ගෘහ නිර්මාණ ශිල්පියෝ උත්සාහ කරනවා. මම මේ කියන්න යන්නෙත් නිවාස ගැටළුවට විසඳුමක් ලෙස නිර්මාණය උන නිවාසයක් පිළිබඳව.

                                         හොංකොං කියන්නේ ගොඩක් ජනාකීර්ණ රටක්. හොංකොං වලින් පදිංචියට සුදුසු නිවසක් කුලියට ගන්න එක ඒතරම් ලෙහෙසි පහසු  දෙයක් නෙමෙයි. හොඳ තත්ත්වයේ එක නිදන කාමරයක් සහිත නිවසකත් මාසික කුළිය ඩොලර් 2100 පමන වෙනවා. මෙවැනි මුදලක් දරගන්න බැරි නිසා ගොඩක් මිනිස්සු ඉතා අඩු මුදලකට කුලියට ගන්න පුලුවන් කුඩා කාමර වල ජීවත් වෙනවා . මේවා කොෆීන් කියුබිකල් (Coffin Cubicle)  නමින් හඳුන්වනවා.( ඒ ගැන විස්තරයක් මම පසුව ලියන්නම්.)

                     ජේම්ස් ලෝ සය්බටෙක්චර් (James Law Cybertecture)   සමාගම නිවාස ගැටළුවට පිළියමක් විදිහට පහසුකම් සහිත කුඩා නිවාසයක් හඳුන්වා දී තිබෙනවා.   ඒ තමයි  Opod Tube House. කොන්ක්‍රීට් වතුර නලයක් පහසුකම් සහිත නිවසක් බවට පරිවර්තනය කිරීමෙන් තමයි මෙම කුඩා නිවාස අනුරුව නිර්මාණය කොට තිබෙන්නේ. වර්ග අඩි දහසක විෂ්කම්භයකින් සහ අඩි අටක් පළලැති මේ නිවසේ අභ්‍යන්තරය තනි පුද්ගලයෙකුට හෝ දෙදෙනෙකුට ජීවත් විය හැකි පහසුකම් වලින් සමන්විතයි.  අවශ්‍ය විට දෙදෙනෙකුට නිදාගත හැකි ඇඳක් ලෙස දිග හරින්න පුලුවන් සෝෆාවක්, මයික්‍රොවේව් උඳුනක් සහ කුඩා ශීතකරණයක් මෙන්ම පහසුකම් සහිත නාන කාමරයකින් මෙම නිවස සමන්විතයි. ඇතුලත සුදු වර්ණය ආලේප කර ඇති නිසා ඉඩකඩ වැඩිපුර පෙන්වන බව මෙහි නිර්මාණකරුවෝ පවසනවා. අවශ්‍ය විටක ජනෙලයක් විදිහට කොටසක් විවෘත කරන්න පුලුවන් රවුම් වීදුරු දොර නිසා හොඳින් හිරු එළිය සහ වාතාශ්‍රය මෙම නිවසට ලැබෙනවා. එමෙන්ම මෙම දොර ස්මාට් වර්ගයේ ජංගම දුරකතනයකින්  අරින්න වහන්න පුලුවන් අන්දමට නිර්මාණය කොට තිබෙනවා.

                  මෙහි නිර්මාණ කරුවන් පවසන ආකාරයට මෙම කුඩා නිවාස, සාමාන්‍ය නිවාසයක කුලී මුදල දරාගන්න අපහසු තරුණ තරුණියන්ට මෙන්ම රැකියාවක් සඳහා හෝ අධ්‍යාපන කටයුතු සඳහා පැමිනෙන අයට ,වසරකට දෙකකට ජීවත් වීමට සුදුසුයි. මෙහි රවු හැඩය නිසා ගොඩනැගිල්ලක් ඉදිකරන්නට නොහැකි කුඩා ඉඩක උනත් ස්ථානගත කරන්න පුලුවන්. අවශ්‍යනම් වෙනත් තැනකට රැගෙන යන්නත් පුලුවන්. ටොන් විසිදෙකක් පමන බරැති මේ ටියුබ් නිවාස හිස් ඉඩක තැනපත් කරන්න යන වියදමත් ඉතා අඩුයි.
මෙහි නිෂ්පාදන වියදම ඩොලර් 15000 පමන වෙනවා. මෙම නිවසක් ඩොලර් 400 පමන මුදලකට කුලියට දෙන්න පුලුවන් බව නිර්මාණකරුවෝ පවසනවා.

      මේවගේ නිවාස අපේ රටට උනත් ගැලපෙනවා. කර්මාන්තශාලා ආශ්‍රිතව, විශ්ව විද්‍යාල ආශ්‍රිතව අඩු පහසුකම් සහිත  බෝඩිම් කාමර වල ඉන්න අයට උනත් හොඳ විකල්පයක්. මටත් ආසා හිතුනා මේවගේ ගෙදරකට. ඉන්න බෑ කියලා හිතුනොත් රෝල් කරගෙන කැමති දිහාකට යන එක විතරනෙ තියෙන්නෙ.










Monday, January 22, 2018

ළොව විශාලතම පිංතූර රාමුව Dubai Frame

පසුගිය වසරේ තිබුනු සමීක්ෂණයකින් එක්සත් අරාබි එමීර් රාජ්‍ය ලොව ධනවත් රටවල් අතුරෙන් නව වෙනි ස්ථානයට පත්වුනා. එමිර් රාජ්‍ය විටින් වීට අපූරු නිර්මාණ ලොවට දායාද කරනවා. ලොව උසම ගොඩනැගිල්ල වන බුර්ජු කලීෆා ගොඩනැගිල්ල,එහිම නිර්මාණය කර ඇති ලොව උසම කුළුණ වන ස්කයිස්ක්‍රේපර් , ලොව විශාලතම සුපිරි වෙළඳ සැල් සංකීර්ණය වන ඩුබායි මෝල්, රියදුරන් රහිතව ධාවනය වන ලොව දිගම මෙට්‍රෝ දුම්‍රිය පද්ධතියට එමීර් රාජ්‍ය හිමිකම් කියනවා. ඔවුන්ගේ අලුත්ම නිර්මාණය තමයි "ළොව විශාලතම පිංතූර රාමුව". එය ඩුබායි ෆ්‍රේම් ලෙස නම් කර තිබෙනවා.
   මෙම රාමුව නිර්මාණයට ඩිරාම් මිලියන එකසිය හැටක් වැයවී තිබෙනවා. මෙය මෙක්සිකානු ජාතික ෆනැන්ඩෝ ඩෙනිස් නම් ගෘහ නිර්මාණ ශිල්පියාගේ නිර්මාණයක්. මීටර් එකසිය පනහක උසින් යුත් කුළුණු දෙකක්  මීටර් සීයක විෂ්කම්භය ඇති වීදුරු පාලමකින්  යාකොට මෙම රාමුව නිර්මාණය කර තිබෙනවා. මෙය රන් පැහැති තහඩු වලින් ආවරණය කොට ඇති නිසා  දිවා කාලයේ සූර්යාලෝකය ලැබුනු විට රන් පැහැයෙන් දිදුලමින් අලංකාර දසුනක් මවනවා, නැරඹුම් මැදිරියේ සිට ඩුබායි නගරය සම්පූර්ණයෙන් නරඹන්න පුලුවන්. මෙහි දකුණු පස සිට බලන විට ස්කයිස්ක්‍රේපර් ද අනෙක් පසින් පැරණි ඩුබායි නගර‍යද දර්ශණය වෙනවා. මෙහි බිම් මහලෙහි තිබෙන කෞතුකාගාරයෙන් ධීවර ගම්මානයක්ව තිබූ ඩුබායි නගරය වර්තමානයේ පවතින තත්වයට ක්‍රමයෙන් නිර්මාණය වූ අන්දම දැක ගන්න පුලුවන්. ඒ වගේම වසර 2050 වන විට ඩුබායි නගරය තිබෙන ආකාරයද වීඩියෝ දර්ශන මගින් දකින්නට අවස්ථාව ලැබෙනවා. මෙය 2020 දී පැවැත්වීමට නියමිත එක්ස්ෆෝ 2020 ව්‍යාපාරික සමුලුවේ ලෝගෝ එක ලෙස භාවිතා කරන්නට තීරණය කොට තිබෙනවා.
ඩුබායි නගරයේ සංචාරක ස්ථාන අතුරෙන් මෙම රාමුව, අනෙක්වාට වඩා ආකර්ෂණය දිනාගනු ඇතැයි අනුමාන කරනවා. රාත්‍රියේදී විවිධ වර්ණයේ නියෝන් එළි මගින් මෙය අලංකෘත වෙනවා. දැනටමත් දෙස් විදෙස් ආකර්ෂණය දිනා ඇති ඩුබායි ෆ්‍රේම් ඉදිරිපිටට වී විවිධ ඉරියව් වලින් ඡායාරූප ගන්න සංචාරකයෝ වැඩි කැමත්තක් දක්වන බව සඳහන්.










Saturday, January 20, 2018

ලෝක රැවුල් කාරයන්ගේ තරඟාවලිය

මම ඔයාලා කාගෙන් හරි "ඔයාගේ විනෝදාංශය මොකක්ද?" කියලා ඇහුවොත් විවිධාකාර පිළිතුරු මට ලැබෙයි. පොත් කියවීම, රට වටේ සංචාරය, බයිසිකල් පැදීම, මල් හිටවීම, යම් කිසි ක්‍රීඩාවක් කිරීම, රූපවාහිනීය නැරඹීම, ඔය වගේ සාමාන්‍ය විනෝදාංශ තමයි ගොඩක් අයට තියෙන්නේ. ඒත් මේ ලෝකයේ තරමක් වෙනස් අන්දමේ විනෝදාංශ වලට හුරු උන අයත් ඉන්නවනෙ. රැවුල වැවීම ත් එහෙම වෙනස් අන්දමේ විනෝදාංශයක්. ඒ කියන්නේ සාමාන්‍ය විදිහට රැවුල වැවීම නෙමේ විවිධ මෝස්තර අනුව රැවුල වැවීම. මම මේ කියන්න යන්නේ රැවුල වැවීම විනෝදාංශය කරගත් ලෝක රැවුල් කාරයන්ගේ තරඟාවලිය ගැන (World Beard and Mustache Championship) . 
               මුලින්ම මෙහෙම තරඟාවලියක් පවත්වලා තියෙන්නේ 1970 වසරේ ඉතාලියේදී. එහෙත් වර්තමානයේ පවත්වන රැවුල් කාරයන්ගේ තරඟාවලිය ආරම්භ කරලා තියෙන්නේ 1990 දී ජර්මනියේදී. ඉතින් මෙහෙම ආරම්භ උන මේ තරඟාවලිය වසරින් වසර එක එක රටවල් වලදී ඒ රටවල සංගම් වල අනුග්‍රහයෙන් පවත්වනු ලබනවා. මේ තරඟාවලියත් එසේ මෙසේ තරඟාවලියක් නෙමේ. රැවුල වවා ඇති ප්‍රමාණ සහ හැඩ අනුව කාණ්ඩ කීපයකට වර්ග කර  මෙම තරඟය පවත්වනවා. විවිධාකාරයේ රැවුල් මෝස්තර තියන අය මේ තරඟයට සහභාගී වෙනවා.බැලූ බැල්මට මේවා ව්‍යාජ ඒවා බව පෙනුනට නෑ මේවා වය්‍යාජ ඒවා නෙමෙයි. මේ රැවුල් දැක්කම එයාලා කන්නෙ බොන්නේ නාන්නේ මූණ හෝදන්නෙ කොහොමද කියලත් හිතෙනවා. ඒවගේම මේවා නඩත්තු කරන්නත් මුදල් හා කාලය ගතවෙනවා ඇති. 2017 වසරේ පැවති තරඟාවලියට සහභාගී වී ජයග්‍රහනය කල රැවුල් කාරයින්ගේ රැවුල් විලාසිතා පහත ඡායාරූප වලින් දැකගන්න පුලුවන්.













Thursday, January 18, 2018

කල්පනාවෙන්


අපි යමක් කරද්දී අවට පරිසරය ගැන විමසිලිමත් වෙන්න ඕනා. මම මේ කියන්නේ ගෙදරදි නෙමේ මග තොටේදී බස් එකේදී කෝච්චියෙදි වගේ පොදු ස්ථාන වලදී. අපි නොහිතුවට අපි දිහා බලාගෙන අපි ගැන අවදානෙන් ඉන්න පුද්ගලයන් ඉන්නවා. මට එහෙම කියන්න හිතුනේ අද උදේ මම නැගපු බස් එකට මගින් නැගපු ගැහැණු ළමයෙක් සීට් එකේ වාඩි වෙලා ෆෝන් එක ඔබනවා මෙලෝ කල්පනවාක් නැතුව. මට හිතුන විදිහට එයා කාත් එක්ක හරි චැට් කරනවා හෝ මැසේජ් කරනවා. ඊට පස්සේ හෝල්ට් එකෙන් නැගපු පිරිමි ළමයෙක් ඒ ළමයා ගාවින් හිටගෙන අර ළමයාගේ ෆෝන් එකට එබිලා එයා ටයිප් කරන ඒවා කියෝනවා. ගැහැණු ළමයාට ඒ ගැන වැටහීමක් නෑ. ඒ ගැහැණු ළමයා මොනවා ටයිප් කරාද දන්නෙ නෑ අර පිරිමි ළමයාගේ මුහුණේ මැවුනේ පුදුම හතටත් වඩා පුදුමයක් දැක්කම මුහුණේ මැවෙන විශ්මයාර්ථයක්. ඒ පිරිමි ළමයා බස් එකෙන් බහින්න දොර ගාවට ගිහිල්ලත් අර ගැහැණු ළමයා දිහා හැරිලා බැලුවේ අර විශ්මයට පත් උන මූනෙන්මයි. ඒ පිරිමි ළමයා ගැහැණු ළමයාගේ හැඩරුව හොඳින්ම මතකේ තියාගත්ත වගනම් තේරුනා. ඇය ටයිප් කලේ අතිශයින්ම පෞද්ගලික දෙයක් නම් දැන් අර පිරිමි ළමයා ඒක දැනගෙන ඉවරයි. තවත් දවසක ඔහුගේ යාළුවෙක් එක්ක යද්දී ඒ ගැහැණු ළමයව දැක්කොත් ඔහු කියවපුවා යාළුවා සමග නොකියා හිඳීවිද. අපට අනිත් මිනිස්සු හදන්න බෑ. ඒත් විමසිල්ලෙන් ඉන්න. විශේෂයෙන් ගැහැණු ළමයි. අනුන්ගේ දුරකතනය කට එබෙන එක ඒ තරම් හොඳ ගුණයක් නූනට ගොඩක් අය ඒ වැඩේ කරනවා. ඒ නිසා කල්පනාවෙන්..

Tuesday, January 16, 2018

ලොව සීතලම ගම්මානය



ලොව සීතලම ගම්මානය පිහිටලා තියෙන්නේ සයිබීරියාවේ. සයිබීරියාව කියන්නේ රුසියාවේ කොටසක්. උතුරු ආසියාව කියලත් සයිබීරියාව හඳුන්නනවා.රුසියාවේ මුළු භූමි ප්‍රමාණයෙන් 77% ක් සයිබීරියාවට අයත් උනත් ජන ඝනත්වය ගොඩක් අඩුයි. සයිබීරියාවේ උතුරු ප්‍රදේශය වසරකට මාස අටක පමන ශීත සෘතුවකට මුහුණ දෙනවා. මේ මම කියන කුඩා ගම්මානය පිහිටලා තියෙන්නෙත් සයිබීරියාවේ උතුරු ප්‍රදේශයේ. 
          Oymyakon කියන ගම්මානයේ ජනවාරි මාසයේ උෂ්ණත්වය ලෙස වාර්තාවී තිබුනේ -67C ක්. මෙම ගම්මානයේ පන්සීයක් පමන ජනතාවක් ජීවත් වෙනවා.කොයිතරම් සීතලද කියනවනම් නිවාස වලින් පිටතට පැමිනියොත් ටික වෙලාවකින් ඇහි පිහාටු වල පවා හිම මිදෙනවළු. එහි ජීවත් වෙන ජනතාවට මේ සීතල නිසා එදිනෙදා ජීවිතයේදී මුහුණ දෙන්න වෙන ගැටළු බොහොමයි.
ඔවුන් භාවිතයට ගන්නා පෑන් වල තීන්ත මිදීම, බැට්‍රි අක්‍රීය වීම වැනි සුලු දේවල් නිසාත් ඔවුන් අපහසුතාවයට පත්වෙනවා. ක්‍රියා විරහිත කලොත් යලි පන ගන්වන්න බැරිවෙයි කියන බයට ඔවුන්ගේ වාහන දවස පුරාම ක්‍රියාමත්ක කර තියනවළු.
 මෙහි පොළව ගලක් වගේ ඝනකම් නිසා මරණයක් උනහම අවසන් කටයුතු කරන්න වලක් හාරන එක එතරම් ලේසි පහසු වැඩක් නෙමේ. මුලින්ම වලක් කැපීමට අවශ්‍ය ප්‍රමාණයට හිම දිය කරගත යුතු වෙනවා, ඒ සඳහා එම ස්ථානයේ ගිනි මැලයක් ගසා පැය කීපයක් තබනවා. ඉන්පසු සිදුරක් සාදා රත්වූ ගල් අඟුරු ඔබනු ලබනවා, මේ විදිහට දින කීපයක් කරලා තමයි ඔවුන් මිනී පෙට්ටියක් දාන්න පුලුවන් තරම් වලක් හාර ගන්නේ. 
මේ ගම්මානේ තියන මාළු වෙළඳ සැල් වල්ට ශීතකරණ අවශ්‍ය වෙන්නෙ නෑ. අධික සීතල නිසා මාළු නරක් නොවී එළිමහනේ තියා ගන්න පුලුවන්. මෙහි ජීවත් වන ජනතාව එළිමහනේ ගත කරන්නේ සුලු කාලයක් විතරයි. සීතල නිසාම ඔවුන් නිවාස අභ්‍යන්තරයට වී ඉන්න උත්සාහ කරනවා. ශීත සෘතුවේදී මෙම ප්‍රදේශයට ආලෝකය ලැබෙන්නේ  දිනකට පැය තුනක කාලයක් පමනයි. දිනක ඉතුරු කාලය තියෙන්නේ අඳුරු වෙලා.







Friday, January 12, 2018

කාන්තාවන්ට පමනක් වෙන්වූ වාහන ප්‍රදර්ශනාගාරයක්

                 සෞදි අරාබියේ කාන්තාවන්ට පනවා තිබූ රිය පැදවීමේ තහනම,මොහොමඩ් බින් සල්මාන් කුමරුගේ මැදිහත් වීමෙන් පසුගිය වසරේ ඉවත් කලා. කාන්තාවන්ට රිය පැදවීම තහනම් කර තිබූ එකම රට උනේ සෞදි අරාබිය.
            ඊට මාස පහකට පස්සේ , ජනවාරි එකලොස් වෙනිදා ප්‍රථම වරට කාන්තාවන්ට පමනක් වෙන්වූ වාහන ප්‍රදර්ශනාගාරයක්(.women only car showroom) ජෙඩා නගරයේ වෙස්ටන් රෙඩ් සී පොර්ට් සිටී (western Red Sea port city) හිදී විවෘත කරලා.මේ ප්‍රදර්ශනාගාරයට පැමිනෙන කාන්තාවන්ට ගැලපෙන වාහන මාදිලි විශාල ප්‍රමාණයක් ප්‍රදර්ශනයට තබා තියෙනවලු. කාන්තාවන්ට පමනක් නිසා, එහි සේවයට යොදවලා තියෙන්නේ කාන්තා සේවිකාවන් විතරලු. අවශ්‍ය නම් පහසු ගෙවීමේ පදනම යටතේ වාහන මිලදී ගැනීමට පහසුකම් සලස්වල තියනවලු. මේ වගේ ප්‍රදර්ශනාගාර රට පුරා විවෘත කරන්න එම ආයතනය බලාපොරොත්තු වෙනවලු.
              සාධාරණ මිලකට වාහන මිලදී ගන්න පුලුවන් නම් හොඳයි කියලා සෞදි කාන්තාවන් අදහස් දක්වලා තිබුනා.සෞදි රජය ජනවාරි මාසයේ ගෑස් මිල වැඩිකිරීමත් වැට් බදු හඳුන්වා දීමත් සමග සෞදි ජනතාවගේ ජීවන වියදම ඉහළ ගොස් තිබෙනවා.
             මෙම ප්‍රදර්ශනය නැරඹීමට සෞදි කාන්තාවන් විශාල පිරිසක් ගොඩක් උද්‍යේගයකින් සහභාගී උනාලු. ඔවුන් වාහන ඉදිරිපිටට වෙලා සෙල්ෆී ඡායාරූප ගත්තලු. සමහරු වාහන වල වාඩි වෙලා ස්ටියරින් වීල් එක ආසාවෙන් අතපත ගෑවලු. වාහනයක් පදවාගෙන නිදහසේ පාරේ යන්න දැන් ඔවුන් හීන මවනවා ඇති. මේ පටන් ගැන්මත් එක්ක ආගමික කාරනා හේතුවෙන් සෞදි කාන්තාවන්ට පනවා තිබූ නීති ටිකෙන් ටික ලිහිල් වේවි. සෞදි කුමාරයා සෞදි අරාබිය නවීන ලෝකයට සරිලන ලෙස ටිකින් ටික වෙනව් කරාවි කියලයි විචාරකයො පවසන්නේ. අපිත් සෞදි කාන්තාවන්ට සුබ පතමු.





Wednesday, January 10, 2018

සහරාවට හිම වැටිලා

ගෝලීය උණුසුම වැඩිවෙනවත් එක්කම ලෝකය කනපිට හැරෙන්න පටන් අරන්. මේ වසරේ ශීත සෘතුවේ අධික හිම පතනය සහ අධික ශීතලත් එක්ක රටවල් බොහොමයක් අපහසුතාවට පත්වුනා. අපටත් සීතල දවස් කීපයක් තිබුනනෙ.
                 කාන්තාරෙකට හිම වැටෙනවා කිව්වොත් කවුරුත් පිළිගන්න එකක් නෑ. ඒත් ඔන්න ලෝකයේ විශාලතම හා උණුසුම්ම කාන්තාරයට හිම වැටිලා.ඔව් සහරා කාන්තාරෙට තමා. සමහර ප්‍රදේශ වලට අඟල් 16 ක පමන හිම තට්ටුවක් දකින්න ලැබුනලු. වසර හතලිහක් තුල මේ විදිහට හිම වැටුනේ දෙවනි වතාවටලු. 1979 වසරේදීත් මේ විදිහටම හිම වැටිලා තිබුනලු. වැලි කඳු වලට හිම වැටුනම කොයිතරම් ලස්සනට තියෙන්න ඇතිද? බලන්නකො මේ පිංතූර ටික.