Tuesday, May 14, 2019

නොපෙනෙන ගුණ

                                                                       අරමුණක් ඉලක්කයක් නැතුව අඩුපාඩු ගොඩක් මැද්දේ ගෙවෙන ජීවිතේ ගැන හිත හිතා තිලිනි වත්ත පුරා ඇවිද්දේ හිත ටිකක් නිදහස් වෙයි කියලා හිතාගෙන. තිලිනි පස්සෙන් ආපු, රොකීව දැකලා බය උන ලේන්නු තරඟෙට කෑ ගහනවා. ඒ මැද්දට දෙමලිච්චෝ රංචුවකුත් එකතුවෙලා එකම කරච්චලයක්. මදැයි හිත නිදහස් කරගන්න කියලා ආවා මෙයාලගේ කරච්චලේ මගෙ ඔලුව තවත් අවුල් කරනවා. රොකී ගහක් උඩ ඉන්න ලේනෙකුට කුරුමානම. අල්ලයි මාව කියනා බැල්මෙන් ලේනා රොකී දිහා බලාගෙන කෑ ගහනවා. රොකියට ඕන එකක් කරගන්න කියලා ටිකක් ඉස්සරහට යද්දී එක පෙළට තියන බෙලි ගස් තුන වටේටම බෙලි වැටිලා. ගොඩක් ගහ යටම නරක් වෙන්නත් ඇවිත්. 

                              "බෙලිගෙඩියක් හොයාගන්න විඳපු දුකක්. මේ ගෙඩියත් ගත්තේ රු 200/= කට.  රෝහල් ගත වෙලා ඉන්න තාත්තාට එහා ඇඳේ ඉඳපු රෝගියා බලන්න ආව කාන්තාවක් කියපු කතාවක් තිලිනිට මතක් නා."

"අපරාදේ"

             තිලිනි වැටිලා තිබුන බෙලි ගෙඩි ටික අහුලලා ගොඩක් ගැහුවා. හොඳ තත්වෙ බෙලි ගෙඩි  දහ අටක් තිබුනා. මේ ටික පළතුරු කඩේට දුන්නා නම් සල්ලි ගන්න තිබුනා. ගෙදරින් කූඩයක් අරන් ඇවිත් තිලිනි බෙලි ගෙඩි ටිකත් අරන් ගෙදර ගියේ හවස තාත්තා බලන්න රෝහලට යනකොට පළතුරු කඩේට දීලා මුදල් ගන්න ඕන කියලා හිතාගෙන.
හෙට තාත්තාට අරන් යන්න බෙලි ගෙඩියක් අරන් තියලා තිලිනි ඉතිරි ගෙඩි ටික කවරෙකට දැම්මා.

"කාටද ළමයෝ මෙච්චර බෙලි?"

"විකුනන්න. "

"ලැජ්ජ නැද්ද ළමයෝ මේවා උස්සන් ගිහින් විකුණන්න"

"මොකට ලැජ්ජා වෙනවද අම්මා තාත්තටම වියදම් කරලා අතේ සතේ නැතුව ඉන්නකොට මේ ටික දීලා කීයක් හරි ගන්න එකත් වටිනවනේ. අම්මා ඉන්නකො මමනෙ අරන් යන්නේ."


" අනේ ඉතින් මට මොකද ඔයාට හොඳ නම්"

            තිලිනිට පළතුරු කඩෙන් බෙලි වලට රුපියල් අටසීයක් ලැබුනා. තිලිනි ඒ තරම් මුදලක් බලාපොරොත්තු උනෙත් නැහැ. තිලිනි ගේ ගණු දෙණුව අවසන් වෙනකන් බලාගෙන හිටපු අංකල් කෙනෙක් බෙලි ගෙඩි දෙක තුනක් තෝරගන්න ගමන් බෙලි ගැන ලොකු විස්තරයෙකුත් කලා.

  බෙලි වල ඇති ඖෂධීය ගුණය ඉතාමත් ඉහලයි.


  •  ඉදුනු බෙලි ගෙඩිය පළතුරක් ලෙසට මෙන්ම ගසේ පංචාගයම ඖෂධ වශයෙන් ගනී. 
  • ඉදුනු බෙලි මදය සුරා ගෙන කෑමටද, පානයක් වශයෙන්ද සකස්කරගත හැක. 
  • අමු බෙලි තම්බා ආහාරයට ගත හැකිය.
  •  බෙලි මල් මෙන්ම බෙලි කටු ද, බෙලි ගැට ද වියලා, තම්බා පානයක් ලෙස ගනී. මේ දෙකම අතිශය ගුණ දායකය. 
  • සෙම් ගතිය, නහයේ බර ගතිය දුරු කිරීමට දුම් ඇල්ලීම සඳහා බෙලි කොළ භාවිත කරයි. 
  • බෙලි  ආහාර මාර්ගයේ රෝගී  තත්ත්ව වලට ගුණදායකයි.
  • බඩ පිපුම පාලනය කරයි.
  • මල බද්ධය දුරු කරයි.
  • අර්ශස් රෝගය සඳහා ගුණදායකයි.
  • ශරීරය සිසිල් කරන පානයක් නිසා නිතර බෙලි මල් පානයෙන් ශරීර සුන්දරත්වයද වැඩි වන බවද කියනවා.
මේ තරම් ගුණ තියන පළතුරක්නේ අපි ඔහේ ඉදිලා වැටිලා යන්න දීලා බලන් ඉන්නේ. අපට අගයක් නෑ.. කියලා හිතන ගමන්  තිලිනි රෝහලට ගියා.
තාත්තා ට ෆාමසියෙන් ගෙනත් දෙන්න කියලා නර්ස් කෙනෙක් දුන්න බෙහෙත් වර්ගයක් ලියලා දුන්නා. ඒකට බෙලි විකුණලා ගත්තු මුදල් සෑහුනා. මේ විදිහට මුදල් කරගන්න පුලුවන් අපතේ යන කොච්චර දේවල් අපේ ඉඩමේ තියනවද කියලා තිලිනිට හිතුනා.