Tuesday, February 23, 2021

ඒබ්‍රහම් ලින්කන්

 


   ඒබ්‍රහම් ලින්කන් උපත ලැබුවේ තනි කාමරයේ කුඩා නිවසකය.  ඔහුගේ පවුල ඉතා දුප්පත් වූ අතර කිහිප වතාවක් පදිංචි නිවස වෙනස් කිරීමට සිදු විය. ඔහුගේ ළමා කාලය පරිපූර්ණ එකක් නොවීය. ඔහුගේ මුළු ජීවිත කාලය පුරාම ඔහු අසාර්ථකත්වයන්ට හා බලාපොරොත්තු සුන්වීම් වලට  මුහුණ දුන්නේය. ඒබ්‍රහම්ට වයස අවුරුදු නවයේදී, මව අහිමි වූ අතර ඔහු සිත් තැවුලට පත් විය.ඕනෑම දරුවෙකු මෙන් ඔහුටද ඔහුගේ මව අහිමිවීමේ අඩුව දැනුනි.  අවුරුද්දකට පසු ඔහුගේ පියා දරුවන් තිදෙනෙකු සිටින වැන්දඹුවක් සමඟ විවාහ විය.  ඒබ්‍රහම් ඇයට බොහෝ සෙයින් ඇලුම් කළේය. ඔහු ඇයට අම්මා කියා ඇමතුවේය. ඔහුගේ ජීව විද්‍යාත්මක මව අහිමි වීමෙන් පසු ඔහුගේ ජීවිතයේ දැවැන්ත හිස්බව පිරවීමට ඇයට හැකි විය.ගොවි පළේ වැඩකටයුතු සඳහා සිය සිරුර වෙහෙසීමට ඒබ්‍රහම් ඒ තරම් කැමැත්තක් දැක්වූයේ නැත. නමුත් ඔහු කියවීමට ප්‍රිය කළේය. ඔහුට පාසැල් යාමට වඩා ගෙදරට වී සිටීමට සිදුවිය. ඔහු විධිමත් පාසල් අධ්‍යාපනය  ලැබුවේ වසරක් පමණි. නමුත් ඔහු  ඉගෙනීම සහ මනස දියුණු කිරීම නතර නොකළේ ය. ඔහු මූලික වශයෙන් අධ්‍යාපනය ලැබුවේ පොත් ඉල්ලා ගැනීමෙන් සහ තමාගේම දෑ අධ්‍යයනය කිරීමෙනි.

                 ඔහුට ලැබෙන සෑම පොතක්ම කියවීය. ඔහු කවදාවත් උසස් විද්‍යාලයට ගියේ නැත. ඔහුගේ නීති උපාධිය පවා ස්වයං අධ්‍යාපනයේ ප්‍රතිඵලයක් විය. ඔහුට ඉගෙනීමට ජීවිත කාලය පුරාම උනන්දුවක් තිබුණි. ඔහුගේ ජීවිතය අසාර්ථකත්වයන්, බලාපොරොත්තු සුන්වීම් සහ පරාජයන්ගෙන් පිරී තිබුණි.

      නමුත් ඔහු කිසි විටෙකත් උත්සාහය අත් නොහැරීමට තීරණය කළේය. ඔහු ඉපදුණේ දුප්පත්කමින්. ඔහුට මව අහිමි විය. ඔහුට රැකියාව අහිමි විය. ඔහු මැතිවරණ අටකින් පරාජයට පත් විය. ඔහු ව්‍යාපාර කටයුතුවලදී දෙවරක් අසමත් විය. දෙවන වතාවට ඔහුගේ ව්‍යාපාරය ආරම්භ කිරීම සඳහා මිතුරෙකුගෙන් මුදල් ණයට ගැනීමට සිදුවිය. නමුත් ඔහු ඉන් අසමත් වී බංකොලොත් විය.
ඒ නිසා ඔහු තම ජීවිතයේ ඊළඟ අවුරුදු 17 ගත කලේ ණය ගෙවීමටයි. ඔහු විවාහ ගිවිසගෙන සිටියේ ඔහු ඉතා ආදරය කළ රූමත් කාන්තාවක් සමඟයි. නමුත් ඔහුගේ පෙම්වතිය මිය ගිය අතර ඔහු සිත් තැවුලට පත් විය. ඒ නිසාම ඔහු ස්නායු ආබාධයකින් පෙළුණු අතර මාස හයක් ඇඳේ ගත කළේය.
පසුව ඔහු විවාහ වී පුතුන් 4 දෙනෙකු ලැබුවේය.  නමුත් ඔහුට එයින් 3 ක් අහිමි විය. ඔවුන් කිසි විටෙකත් වැඩිහිටිභාවයට පැමිණියේ නැත. දිවි ගලවා ගත්තේ එක් අයෙකු පමණි. බොහෝ පරාජයන් පසු, බොහෝ ප්‍රතික්ෂේප කිරීම් වලින් පසු ඔහු එක්සත් ජනපදයේ ජනාධිපති ලෙස තේරී පත්විය. බොහෝ දුප්පත්ව ඉපිද, අහිමිවීම්, පරාජයවීම් බොහෝ ගණනකට පසු ඔහු ජීවිතය ජයගෙන තිබුනි. 


Thursday, August 20, 2020

ගැබී

The Long Road Home - Danielle Steel

ගැබී- කෝශලී සිරිචන්ද්‍ර

 

       ගැබී ප්‍රබන්ධයකි. එය ධෛර්ය, බලාපොරොත්තුව හා ආදරය පිළිබඳ දැනෙන කතාන්දරයකි. 

       අම්මාගේ සපත්තු වල තියුණු අඩි ශබ්දය ඇසෙනවිට ගැබ්‍රියෙල්ලා මවගේ ඇඳුම් අල්මාරියේ සැඟව සිටියාය. ඇය නිසැකවම තමාව සොයාගන්නා බවත් ඉන්පසු සිදුවෙන දේත් දැන දැනම ඇය එහි සැඟව සිටියාය. සැඟවෙන්නට තැනක් එම නිවසේ ඇයට නොවීය. මවගේ පහරදීම් වලින් ඇයව ගලවාගන්නට කිසිවෙකුත් එහි නොවීය.

    ඩැනියල් ස්ටීල් The Long Road Home ලියන්නට පටන් ගන්නේ කියවන කෙනෙකුට දරාගත් නොහැකි මට්ටමට මවගේ අමානුෂික පහරදීම් වලට ලක්වෙන දැරියකගෙනි. මුල් පරිච්ඡේදය කියවන විට පොත පැත්තකට දමන්නටත් මේ තරම් අමානුෂික මවක් හිතේ ඇඳගෙන ඇය මේවා කෙසේ ලීවාදැයි හිතෙන තරමටම එය මා සංවේදී කොට තිබුනි. එහෙත් මේ දැරියගේ ඉරණම කෙසේ විසඳේදැයි යන කුහුලෙන් යළි කියවන්නට සිතුනි.

            ඇය ඉපදුණු මොහොතේ සිටම ඇයට මවගෙන් වෛරය හැර වෙන කිසිවක් නොලැබෙන අතර, ඇගෙන් ලැබෙන පහර දීම් වලට හේතුව බොහෝ විට ඇය අහම්බෙන් යමක් බිම දැමූ නිසා හෝ ඇයගේ හැසිරීම මව සතුටු කිරීමට ප්‍රමාණවත් නොමැති නිසාය. ඇගේ පියා ඇය මවගෙන් ගලවා ගැනීමට කිසිවක් නොකරයි. ඇගේ මව ඇයට නිතර පහර දෙන්නේත් ඇගේ පියා ඒවා නොදැක්කා සේ ඉන්නේත් තමන්ගේ ඇති වැරදි නිසා යැයි ගැබී සිතයි. ඇගේ මව තනි වචනයකින් විග්‍රහ කලහොත් ඇය යක්ෂණියකි. ඇය සිය දරුවාට වෛර කළාය, ඇයට ඊර්ෂ්‍යා කළ අතර කුඩා දැරිය දුක් විඳිය යුත්තේ කෙසේදැයි ඇය දැන සිටියාය. අවුරුදු 9 කට පසු ඇගේ පියා ඔවුන් දෙදෙනා හැර ගිය විට ඇගේ මව ඇයව කන්‍යාරාමයේ තබා දෙවන විවාහයට යාමට තීරණය කරයි. 

         ගැබී ගේ මව ඇය වෙනුවෙන් කල හොඳ දෙයක් ඇත්නම් ඒ ඇයව කන්‍යාරාමයට බාර දීම පමනි. කන්‍යාරාමයේදී ඇයට පවුලක් ලැබේ, ආදරය හා රැකවරණය ලැබේ, ලිවීමට ඇති ඇගේ ආශාව අගය කෙරේ. නමුත් අතීතයේ භීෂණය ඇයව අත්හරින්නේ නැත. ඇයට 30 හැවිරිදි කඩවසම් පූජකවරයකු වන ජෝ කොනර්ස් මුණ ගැසෙන අතර වැඩි කල් නොගොස් ඔවුන් මිත්‍රත්වයක් ගොඩනඟා ගනී. අවසානයේදී එය ප්‍රේම සම්භන්ධයක් දක්වා දුර යයි. ඔවුන්ගේ ලෝකය තුළ ආදරය තහනම් නමුත් ඔවුන්  ඒ වෙනුවෙන් සටන් කිරීමට තීරණය කරයි. නැතහොත් පොත කියවාගෙන යද්දී අපට  සිතන්නේ එයයි. අපේ සිතුවිලි බිඳ දමමින්  ජෝ සියදිවි නසා ගන්නා අතර ගැබීට ඔහුගේ මරණයට හේතු වූයේ ඇයගේ වරදක් යැයි යන හැඟීම ඉතිරි වේ. ඇය ගැබ්ගෙන ඇති බව දැනගන්නා අතර ජෝගේ මරණය පිළිබඳ පුවත දරුණු ගබ්සාවකට තුඩු දෙයි. ඇයව කන්‍යාරාමයෙන් ඉවතට ඇද දමන අතර සෙමෙන් ඇය නිව්යෝර්ක්හි තමා වෙනුවෙන් නව ජීවිතයක් ගොඩනඟයි. ඇය නැවතී සිටීමට බෝඩිමක් සොයාගනී, එහිදී ඇයට වයස්ගත් මහාචාර්ය වරයෙක් හමුවන අතර ඔහු ඇයට දුවෙකුට මෙන් ආදරය කරයි., ඇයගේ ලේඛන කලාව දියුණුකරගැනීමට ඔහු ඇයට මඟ පෙන්වමින් ඇයට බොහෝ උපකාර කරයි. ඇයට ස්ටීව් නම් පෙම්වතෙක් හමුවේ. ඇය ඔහුට ආදරය නොකලත් ඔවුන් අතර සම්භන්දයක් ඇතිවේ. දැන් ඇය වෙනුවෙන් දේවල් සුමට වනු ඇතැයි පොත කියවන අපට සිතන විට, ඒ මිනිහා වංචාකාර මිනිසෙකු මිස අන් කිසිවක් නොවන බවත් ඔහු ඇය සමඟ සිටින්නේ ඇය උපයාගත් මුදල් සඳහා පමණක් බවත් ඇයට දැනගන්නට ලැබේ. මහාචාර්යවරයා ස්ටීව් ගේ රහස දැනගෙන ගැබීව අතහරින්නයැයි පවසයි. ස්ටීව්ගේ පහර දීමෙන් මහාචාර්යවරයා මියයයි. ඔහුගේ අවසන් කැමැත්ත අනුව ගැබීට විශාල මුදලක් හිමිවේ. ස්ටීව් එය ඉල්ලා ඇයට කරදර කරයි. ඇය එය ප්‍රතික්ෂෙප කරන විට ඔහු ඇයට දරුණු ලෙස පහර දී ඇයව මරා දමයි. ඇයව රෝහලට ගෙන යන අතර තරමක් ආශ්චර්යමත් ලෙස ඇගේ ජීවිතය බේරෙයි. ඇය සිටින රෝහලේ වෛද්‍ය පීටර් සමඟ මිත්‍ර වී එකිනෙකාට කැමති වීමට පටන් ගනී. අවසානයේදී, ගැබීට ඇගේ දෙමාපියන් ආදරය නොකිරීමට හේතුව සහ ඇය අතහැර දැමීමට හේතුව දැනගැනීමට උවමනා වේ. ඇය තම පියා බැලීමට ගොස් ඇයව බේරා ගැනීමට තරම් ශක්තියක් ඔහුට නොවූ බවත් තවමත් ඔහු දුර්වලයෙකු බවත් වටහා ගනී. ඉන්පසු ඇය කැලිෆෝනියාවේ සිටින තම මව හමුවීමට තීරණය කරයි. ඒ වනවිට ඇය මියගොස් වග ඇගේ සැමියාගෙන් දැනගන්නට ලැබේ.ඇගේ මව ආදරය කළ හැකි කාන්තාවක් නොවනබවත්, ඇය යක්ෂනියක් වැනි කාන්තාවක් බවත්  ඇගේ සුළු පියා දැන ගනී. ගේබ්‍රියෙලා අවසානයේ ඇගේ අතීත ජීවිතයෙන් මිදීම සොයා ගන්නා අතර වෛද්‍ය පීටර් සමඟ ඇය නව ආරම්භයක් කරා ගමන් කරයි.

                           මම ඩැනියෙල් ස්ටීල් ගේ පොත් කීපයක් කියවා තිබේ. ඒවායේ චරිත අතරින් දුක සිතෙනා සහ කියවනවිට කඳුලු සලන්නට සිතෙනා කතාවක් තිබුනේ ගැබ්‍රියෙල්ලාට පමනි. ඇගේ මව කොයිතරම් කුරිරුදැයි සිතුනි. ප්‍රබන්ධයක් උනත් ඇයට වෛරකරන්නට මට සිතුනි. එහෙත් ගැබ්‍රියෙල්ලා, ඇය අසරණ වන හැම මොහොතකම ශක්තිමත් වූවාය. කෙසේ හෝ ඇගේ ජීවිතය බේරාගත්තාය. එකකට පසු තවත් නරක දෙයක් ඇයට සිදු වන අතර ඇය ඒවා සමඟ පුදුම ලෙස සටන් කරයි. ජෝ කොනර්ස්, පූජකයා සහ ඇගේ පෙම්වතා ඇගේ පියාගේ චරිතයට සමාන චරිතයකි. මම ඔහුට අනුකම්පා කළත්, ඔහු බොහෝ මට්ටම්වල දුර්වලයෙක් විය. මම මෙම පොත අවසානය දක්වා කියවීමෙන් සතුටක් ලැබුවෙමි. පොත කියවා නොමැතිනම් ඔබත් කියවන්න. ආශිර්වාද ප්‍රකාශනයකි. 

My rating 5/5

Friday, August 14, 2020

සොරාගත් මතක



 Tell Me your Dreams - Sidney Sheldon

සොරාගත් මතක - කෝෂලී සිරිචන්ද්
ප්රධාන චරිත
ඈෂ්ලි පැටර්සන්, ඇලෙත් පීටර්ස්, ටෝනි ප්රෙස්කෝට්, ඩේවිඩ් සිංගර්, ස්ටීවන් පැටර්සන්, ගිල්බට් කේලර්, ජෙසී ක්විලර්
ඈෂ්ලි පැටර්සන් , සිලිකන් වැලී හි පිහිටි පරිගණක ග්රැෆික් සමාගමක සේවය කරන බුද්ධිමත් තරුණියකි. ඇය තනිකඩය, විනෝදශීලී නැත. තනිවම ඇගේ නිවසේ හුදකලාව ජීවත් වේ. කවුරුන් හෝ ඇය පසුපස එන බවක් ඇයට දැනෙන්නට පටන් ගනී. ටෝනි ප්රෙස්කෝට් සහ ඇලෙත් පීටර්ස් ඈෂ්ලිගේ සම සේවකයින් වේ.
ටෝනි අන්තර්ජාලයේ චැට් රූම් වලට ගොස් චැට් කරන්නට සහ ඩිස්කෝ ඩාන්ස් වලට ප්රිය කරයි. ඇලෙත් චිත්ර අඳින්නට සහ කෞතුකාගාර නරඹන්නට ප්රිය කරයි.
ඔවුන් දෙදෙනාම ඈෂ්ලිව ඇගේ ඒකාකාරී ජීවිතයෙන් මුදවා ගන්නට උත්සාහ කරති. ඈෂ්ලි, ටෝනි සහ ඇලෙත් ගේ නම් මිනීමරුම් කීපයකට ඈඳෙයි. එම මිනීමරුම් සියවසේ විකාර සහගත නඩු විභාගයකට මග පාදයි.
සිඩ්න් ෂෙල්ඩන් විසින් රචිත Tell Me Your Dreams කෘතිය "සොරාගත් මතක" ලෙස කෝෂලී සිරිචන්ද්ර විසින් සිංහලයට පරිවර්තනය කර ඇත. මෙම කෘතිය ප්රබන්ධයක් වන මුත් එයට සත්ය සිදුවීම් පදනම් වූ බව පැවසේ. මෙම පොත මම සැබවින්ම කියවා රස වින්ඳෙමි. ඊළඟට කුමක් වේදෝ යැයි කුතුහලයෙන් පෙළුනෙමි. අධිකරණය හෝ අපරාධ නීති ගැන දැනුමක් නැති වුවත් අධිකරණයක නඩුවක් අසන අවස්ථාවක් හිතෙන් මවා ගෙන පොත කියවීම අපහසු නැත. බහු පෞර්ෂ ආබාධය ( Dissociative identity disorder (DID) නම් මානසික රෝගී තත්ත්වයක් පිළිබඳ අසා නොතිබුනි. එක පුද්ගලයෙක් තුල පුද්ගලයන් කීප දෙනෙක් ජීවත්වීම සහ ඔවුන් ගතිගුණ වලින් එකිනෙකාට වෙනස්වීමත් යම් යම් අවස්ථාවල සැබෑ පුද්ගලයාගේ මනස අනෙකාට පාලනය කිරීමත් කලහැකි බව දැනගත්විට ගූගල් හරහා එම රෝගය පිළිබඳ කරුණු සෙවීම බොහෝ කුතුහලය දනවන්නක් විය.
ඈෂ්ලි කුඩා වියේදී සිය පියා විසින් අපහරණයට ලක් කොට තිබුනි. ඒ පිළිබඳ මව දැනුවත් කලද ඇය එය නොසකලා ඈෂ්ලිව නොසලකා හැර තිබුනි. එම හේතුවම ඇයව ඇයටත් හොරා මානසික රෝගියෙක් කර තිබුනි. අවසානයේ ඇයත් නොදැන ඇය විසින් පස් දෙනෙක්ව අමානුෂික විදිහට ඝාතනය කොට තිබුනි.
කියවලා නැති අය කියවන්න. ආශිර්වාද ප්රකාශනයක්.

Monday, June 29, 2020

කුමර කොබෙයි


                                      ශමෙල් ජයකොඩි මහත්මියගේ ඇමෙරිකා කියවා අවසන් වූ සැනෙන් "කුමර කොබෙයි" පොත ලැබුණි. "ඇමෙරිකා" පොතට වඩා වෙනස් කතාවක් "කුමර කොබෙයි" හි ගැබ්වී තිබේ. මා ඇගේ පොත් වලින් කියවා ඇත්තේ අනන්ත දේශය, ඇමෙරිකා සහ කුමර කොබෙයි පමනි. අනෙක් පොත් දෙකට වඩා "කුමර කොබෙයි" මාගේ සිත් ගත්තේ එහි කතා නායිකාවන් තිදෙනාගේ ගතිගුණ අඩු වැඩි වශයෙන් මා තුලත් තිබෙන නිසා යැයි සිතමි.
                                                       කැනඩාවේ වෙසෙන ශ්‍රී ලාංකික කාන්තාවන් තිදෙනෙක් මෝටර් රථයකින් ඇමරිකා මහද්වීපය හරහා යෙදෙන දින හතක චාරිකාවක් පදනම් කරගෙන මෙම පොත රචනා කර ඇත. එහි ප්‍රධාන කතා නායිකාව වන ඉන්දිකා කැනඩාවේ කෘෂි ආයතනයක රැකියාව කරන යම් යම් හේතු නිසා විවාහය ප්‍රමාද වූ අයෙකි. ඇයට සැන් ෆ්‍රැන්සිස්කෝ වල වීසා නොමැතිව රැඳී සිටින නොදුටු පෙම්වතෙක් සිටියි. කාන්තාවක් ලෙස දරුවන් ලබන සරු කාල සීමාවේ කෙලවරේ සිටින ඇයට විවාහ වන්නට හෝ දරුවෙක් ලබන්න යැයි මිතුරියන් ඉල්ලා සිටියි. ඇගේ පෙම්වතා කාලිංග බලන්නට ඇය ඇගේ මිතුරියන් වන නිර්මලා සහ අරුන්දතී සමග  ඇමරිකා මහාද්වීපය හරහා සැන් ෆ්‍රැන්සිස්කෝ යයි.
                                             චාරිකාව අතර තුරදී ඔවුන් තිදෙනාගේ ජීවිතය විටින් විට පර්ච්ඡේද වශයෙන් දිග හැරේ. ඔවුන්ගේ ජීවිත අසාර්ථක නැත. ඔවුන් කිසියම් මාර්ගයකින් ජීවිතයේ සාර්ථකත්වය ලැබූවන්ය. එහෙත් ඔවුන්ගේ ජීවිත තුල කඩා වැටීම්ද ඇත. 
                                         නිර්මලා දක්ෂ ව්‍යාපාරිකාවකි. දරුවන් දෙදෙනා සමග සාරවත් ජීවිතයක් ගත කරයි. එහෙත් ඇගේ සැමියාට අනියම් සබඳතා දෙකකි. දරුවන්ද සිටී. ඇය ඒ බව දැන දැනත් ඒ ඔහුගේ චරිත ස්වභාවය බව සිතා ඔහුට කැමති දෙයක් කරන්නට ඉඩදී දරුවන් සමග ජීවත්වෙයි.
                     අරුන්දතී ට දරුවන් දෙදෙනෙකි. ඇගේ පළමු සැමියා (වීසා ගැනීමට කරගත් විවාහයකි ) මිය ගොස්ය. ඔහුත් දැනුවත්ව ඇයගේ තිබූ සම්භන්දයෙන් ලැබුනු දරුවන් දෙදෙනා සමග ඇය ජීවත්වෙයි. සූදුවට හා බීමට  ඇබ්බැහිවී පුනරුත්තාපනය වන ඇගේ දරුවන්ගේ පියා ඇවිත් රැගෙන යන ලෙස ඔහුගේ පෙම්වතිය කරන ඉල්ලීම මත ඇය ඔහු සොයා ඉන්දිකාලගේ ගමනට එකතුවෙයි. අරුන්දතීට වෙනත් පෙම්වතෙකුද ඇත.
                            තුන් ආකාරයක ගති ගුණ ඇති කාන්තාවන් තිදෙනෙක් වටා ගෙතෙන මෙම කතාව මම එක හුස්මට කියවා අවසන් කලෙමි. ටිකින් ටික කියවා රස විඳින්නට නොහැකි තරම් එය මාව ආශක්ත කරගෙන තිබුනි.
             කාන්තාවන් වේවා, පිරිමින් වේවා අප ලෝකයට පෙන්වන අපේ ජීවිතයට වඩා හාත්පසින් වෙනස් කතාවක් අභ්‍යන්තරයේ තිබිය හැක. ජීවිතයේ කොටසක් සාර්ථක වෙද්දී කොටසක් අසාර්ථක විය හැක.
               ඔවුන්ගේ චාරිකාවේදී ඇමරිකාවේ නගර එහි සුවිශේෂී ස්ථාන සහ භූ විෂමතා, එහි ජන ජීවිතය පිළිබඳවද විස්තර කෙරේ. ඇමෙරිකා සහ කුමර කොබෙයි කියවූ පසු ඇමෙරිකාව පිළිබඳ මම මවාගෙන සිටි චිත්ත ස්වරූපය සම්පූර්ණයෙන්ම වෙනස් උනා. ඒ වගේම කතුවරිය අපේ මවු රට ලංකාව තරම් ජීවත් වෙන්න හොඳ රටක් නොමැතිබව නොකියා කියන බවත් වැටහුනා. 
         


               
  

Thursday, June 25, 2020

ඇමෙරිකා


ඇමෙරිකා- ශමෙල් ජයකොඩි

ශමෙල් ජයකොඩි මහත්මිය, ස්වර්ණ පුස්තක සම්මානයට කීප වතාවක්ම නිර්දේශ උන වෙනස් ආකාරයේ පොත් රචනා කරන ලේඛිකාවක්. පුස්තකාලයේ පොත් රාක්ක වලට එකතු වූ අලුත් පොත් අතරේ ඇගේ "ඇමෙරිකා" පොතත් තිබුනා. පොත කියවන පළවෙනි සාමාජිකයා වෙමින් පොත මම අරගෙන ආවා.
           විදෙස් රටකට ගිහින් ලංකාවට වඩා හොඳ ජීවිතයක් ලබාගන්න බොහෝ දෙනෙක් හීන මවනවා. ලංකාවේ ඉඳලා වැඩක් නෑ වෙන රටක පදිංචියට ගියොත් දරුවන්ටවත් හොඳ කලක් යයි කියලා කියන අයත් ඉන්නවා.  අපේ ගති සිරිත් සංස්කෘතික ලක්ෂණත් අරගෙන ගිහින් විදෙස් රටක පදිංචිවෙලා, වෙනස් සංස්කෘතියක් වෙනස් ජීවන රටාවක් වෙනස් මිනිසුන් අතරේ අපේ විදිහට ජීවත්වෙන්න ගිහාම ලොකු ඝට්ටනයකට මුහුණ දෙන්න වෙනවා. 
                මෙම පොතේ කතා නායකයා සහ නායිකාවත් ඒ වගේ ලොකු ඝට්ටනයකට මුහුණ දෙනවා. හොඳ රැකියා ලැබුනත් මිල මුදල් ගෙවල් යාන වාහන සැප සම්පත් ලැබුනත් ඔවුන්ට එයින් තෘප්තියක් ලැබෙන්නෙ නැහැ. ඒ වගේම කතාව කියවාගෙන යනකොට අනිත් රටවල් වලින් පැමින ඇමෙරිකාවේ පදිංචි උන පුද්ගලයින් පවා ඔවුන්ගේ රටේ ජීවත්වූ ආකාරයට ජීවත් වෙන්න දරන උත්සාහයක් තමයි පෙන්වන්නේ. ඇමෙරිකාවේ මිනිස්සු නැහීගෙන වැඩ කරනවා , රජයට බදු ගෙවන ගමන් ඔවුන් බොහොමයක් දෙනා අග හිඟයෙන් තොර දිවියක් ගත කරනවා. සති අන්තයේ සහ නිවාඩු කාලයේ සංචාරයේ යෙදීමෙන් විවිධාකාර විනෝදාංශ වලට යොමුවෙලා සතුටු වෙනවා.
               ඔවුන්ගේ දරුවන්ට දෙමාපියන්ගේ බලපෑමෙන් තොර නිදහස් ජීවිතයක් තිබෙනවා. අපේ රටේ දරුවන් දෙමාපිය අනසක යටතේ ජීවත්වෙන දෙමාපියන්ට උවමනා දේවල් පමනක් කරන (සමහර වෙලාවට විවාහක දරුවන්ගේ ජීවිත පවා ගෙවෙන්නේ ඒ විදිහට ) දරුවන් කොටසක්. ප්‍රදීප් සහ නිලංකාට ඔවුන්ගේ දරුවා ඇමෙරිකාවේ දරුවන් විදිහට හැඩ ගැසී ජීවිතය විනාශ කරගනීදෝ යන බියෙන් ජීවත්වෙන්න සිදුවෙනවා.
                   බොහෝ වෙලාවට විදෙස් රටවල් වල ජීවත්වෙන අපේ රටේ අය ගොඩක් සුව පහසු ජීවිතයක් ගෙවන බව තමයි අපේ රටේ ජීවත්වෙන අය හිතාගෙන ඉන්නේ. ඒ වගේම විදෙස් රටවල ඉන්න බොහොමයක් දෙනා මවා පෙන්වන්නෙත් එහෙමයි. ඒ වගේ වාතාවරණයක් යටතේ කතුවරිය වෙනස් කෝණයකින් මේ පොත ලියනවා. කොටසක් ඒ රටේ සංස්කෘතියට හැඩ ගැහෙනවා ඇති. තමන්ගේ උපන් රට සහ ජීවත්වෙන රට සසඳන්නට යාමෙන් එහෙත් මෙහෙත් දෙදිහා ගැනම කලකිරීමක් තියන ප්‍රදීප් වගේ අයත් ඇති.
           කොහොමත් මිනිස්සු උනාම තමන්ට ජීවත්වෙන්න වෙන වටපිටාවට , රැකියා ස්ථානයට ආශ්‍රය කරන්න වෙන මිනිසුන්ගේ ජීවන රටාවට යම් ආකාරයකට හැඩගැසෙන්න, ගැලපෙන්න වෙනවා. එහෙම නැතුව අපි හුරුවෙලා තියන විදිහට ඒ තැන්වල හැසිරෙන්නත් අනිත් දේවල් සංසන්දනය කරන්නත් ගියොත් අපේ ජීවිත නීරස සහ අතෘප්තිමත් එකක් වෙන්න තියන ඉඩ වැඩියි.
                   ඕනෑම දේක හොඳ සහ නරක දෙකම තියනවා. අපි ගොඩක් වෙලාවට නරක ඉස්මතු කරගන්න උත්සාහ කලාට හොඳ ඉස්මතු කරගන්න උත්සාහ කරනවා අඩුයි. ඕනෑම දේක සුබ සහ හොඳ පැත්ත විතරක් බලනවා නම් නරක සහ අසු පැත්ත නොසකලා හරිනවානම් ජීවත්වෙන්න පහසුයි. මෙම කතාවේ ප්‍රදීප්ට ඒ දේ කරන්න බැරිවෙනවා. නිලංකා අදාල තැන අදාල විදිහට හැඩගැහෙන්න යම් තාක් දුරට සමත් වෙනවා. සහන් එරට සමාජය ගැන සහ ඔහුගේ දෙමාපියන් ගැනත් හොඳ වැටහීමකින් ඉන්නවා. 

"ලෝකේ කොහේ ගියත් මනුස්සයෝ කියන අය එකයි. හැමෝම ළඟ හොඳ නරක තියෙනවා. එහෙම හිතුවොත් ඔයාලට ඕනෑ තැනක සතුටෙන් ඉන්න පුළුවනි. "
               -සහන්-

                         පරිවර්තන පොත් කියවන්න හුරුවෙලා උන්න මට අපේ ලේඛිකාවකගේ වෙනස් ආකාරයේ පොතක් කියවන්න ලැබුනාට සතුටුයි.